مسجيدين پلاني و كسيگي
اورميه شهرينين ان مهم عابدهلريندن اولان جمعه مسجيدي گئنيش اراضيني توتور. ايچ حيهطي گونئيدن قاپايان اوزونسوو تيكيلي (اوزونلوغو ۸۰ مئتره ياخين) مسجيدين اسكي حيصهسيدير. بو حيصه ده بيرباشا تيكيلمهميشدير. اونون كومپوزيسيا مركزي تيكينتيسي۱۲-جي يوزيله عاييد ائديلن سلجوق اثريدير.
اورميه جمعه مسجيدينين اؤزهيي ايلكين حاليندا گونئي طرفي بوتؤو، اوچ طرفينين هر بيرينده ايكي اوجا سيوري تاغ آچيريمي اولان و گونبزله (ديامئتري ۱۱،۵) اؤرتولن سجييهوي سلجوق مقصورهسي اولموشدور. گونبزه كئچيد بؤلومو سككيز اوزلو توتوم شكليندهدير.
مسجيدين مئحرابي ائلخانيلرين حاكميتي زامانيندا -هيجري ۶۷۶–جي ايلده (ميلادي ۱۲۷۷) يئنيدن ايشلنميشدير. ايري اؤلچولري (۷،۸۲ م X 5،۴۸ م) و يوكسك بديعي – تئكنيكي سويهسي ايله ديرلي گجتراشليق اثري اولان بو مئحرابين مؤلفي نققاش ابدولمؤمين شرفشاه اوغلو تبريزيدير. اوزونسوو، اوچنئفلي سالون گؤرونور بو چاغدا تيكيلميشدير. جمعه مسجيدينين دوزبوجاقلي ايتينين باتي، دوغو و قوزئي طرفلريني قاپايان حجرهلر، يئرلشگهلر و ديگر يارديمچي بينالار سونراكي دؤورلرده اينشا ائديلميشدير.
قايناق:ديليميزين بيليم سسي